Chirchiq davlat pedagogika universitetida qabul jarayonlari, qabul kvotalari, ularning ta’lim shakllari bo‘yicha taqsimoti va “Qabul-2023” yangiliklari borasidagi savollar barchani qiziqtirmoqda. “Qabul-2023” eng avj pallasiga kirdi. Shu munosabat bilan kecha Chirchiq davlat pedagogika universiteti qabul kotibi Vohid Fayziyev ishtirokida brifing o‘tkazildi.
Tadbirda 2023/2024 o‘quv yili qabul jarayonini tashkil etish, qabul parametrlari hamda kirish test sinovlarini o‘tkazish bilan bog‘liq barcha savollarga atroflicha javob berildi.
Jumladan, magistratura va bakalavriatning kunduzgi ta’lim shakliga davlat granti asosida o‘qish uchun ajratilgan o‘rin taqsimoti, besh yil ish stajiga ega bo‘lgan xotin-qizlar uchun to‘lov-kontrakt asosidagi qabul parametrlarining ta’lim yo‘nalishlari kesimidagi taqsimoti, nogironligi bo‘lgan shaxslar uchun qo‘shimcha 2 foizli qabul ko‘rsatkichlari taqsimoti, Mehribonlik uyi va Bolalar shaharchasining bitiruvchilari uchun qo‘shimcha 1 foizli qabul ko‘rsatkichlari taqsimoti, Harbiy tavsiyanomaga ega bo‘lganlar uchun qo‘shimcha 5 foizli qabul ko‘rsatkichlari yuzasidan batafsil ma’lumot berildi.
“Ko‘pchilik abituriyent deganda bu yilgi maktab bitiruvchilarini tushunadi, vaholanki ChDPUga yoshi ulug‘ abiturientlarning ham xujjat topshirishi ko‘p uchraydi. Masalan, ayni vaqtda universitetimizda 68 yoshli talaba tahsil olmoqda. Chirchiq davlat pedagogika universitetida ham masofadan, ham kelib xujjat topshirish imkoniyati bor. Bu borada ham barcha qulaylik va sharoitlar yaratishga intilganmiz”, – dedi qabul kotibu Vohid Fayziyev.
Shuningdek, jurnalistlar universitetning qo‘shma ta’lim dasturlari, talabalarning xalqaro darajadagi yutuqlari, xalqaro aloqalari borasidagi natijalariga ham qiziqishdi.
Anjuman so‘ngida qabul jarayoni mutaxassislari abituriyentlardan test jarayonlariga kechikmaslikni so‘rashdi. Chunki kechikkan yoki boshqa sabab bilan testga kelolmaydigan abituriyentlar uchun qayta test tashkil qilib berilmaydi.
“Faqatgina bir yil – pandemiya vaqtida kasal bo‘lganlar uchun test imtihoni qayta tashkil qilib berilgandi. Lekin hozirgi me’yoriy hujjatlarda kechikkanlar uchun testni qayta o‘tkazish nazarda tutilmagan”, – dedi mas’ullar.
